Mitahan sa iyang kaugalingon ngadto sa kapolisan sa dakbayan sa Mandaue niadtong Lunes sa hapon ang usa ka lalaki kinsa giingong miunay sa pagpusil sa ilang family driver.
Si Joseph San Shane Barita, 35-anyos, nagpuyo sa Sitio Mahayag, Barangay San Isidro ang gitugyan nila ni SPO1 Edgar Causon ug SPO2 Danilo Barita, paryente sa suspetsado parehong mga polis sa dakbayan sa Mandaue ngadto sa kapolisan sa dakbayan sa Talisay.
Si Barita nagtingkagol karon diha sa Talisay police detention cell.
Kahinumduman nga si Barita ang gipasanginlang mipusil patay ni Francisco Egos niadtong Biyernes sa gabii kinsa si Danny Boy Villacillo ang handler sa manok sa suspetsado maoy nakasaksi sa maong hitabo.
Base sa imbestigasyon ni PO1 Erwin Carbonquillo nga selos ang hinungdan sa maong pagpamusil.
Si Police Superintendent Romeo Perigo, hepe sa kapolisan sa Talisay sa pakighinabi niini kagahapon sa buntag sa Banat News nagkanayon nga nasulbad na ang maong kaso tungod sa pagtahan sa suspetsado ngadto kanila ug ila kining gi-prioritized kagahapon.
Matud sa hepe nga kagahapon sa buntag mitawag ngadto sa imbestigador ang paryente sa biktima kinsa miayuda aron makompleto ang mga dokumento sa kaso nga ilang ipasaka batok kang Barita.