Usa ka gikatahong lalaking dunay deperensya sa pangisip nga nag-amok ug gisuwayan og tigbas ang konsehal sa lungsod sa Poro ang napusilan sa mga polis niadtong Biyernes sa hapon.
Giila sa kapolisan ang napusilan mao si Gerardo Loon, 54, residente sa barangay Tigis nagbitbit og sundang ug nagpunay og bahad sa mga tawo nga iyang patyon kung dunay moduol kaniya.
Ang buot niyang tigbason mao si Poro municipal councilor Emilianito Burlasa kinsa miresponde usab sa dapit tungod sa kapeligro na sa sitwasyon diha sa maong merkado dihang misulod sa usa ka balay sa maong dapit ang suspek.
Sumala pa sa kapolisan ang pag-umangkon ni Loon nga giilang si Jon Boy maoy nanawag og polis human ang uyoan kalit miwara sa gibitbit nga sundang dihang ilang giduol.
Sumala pa sa mga polis base sa gitug-an kanila sa mga kabanay ni Loon nga duna kini deperensya sa iyang pangisip ug gikabalak-an nilang makasakit kini og tawo hinungdan nga dali silang mitawag og polis.
Apan pag-abot sa kapolisan diha sa maong barangay bisan giunsa paghangyo sa pagtahan sa iyang kaugalingon gikatahong wala gihapon kini mopatuo.
Pila ka gutlo ang nakalabay miabot si Tigis barangay konsehal Nilo Lucañas ug miapelar kang Loon nga ilabay ang iyang sundang sa gawas ug motahan sa kapolisan apan gikatahong wala gihapon mopatuo si Loon hinungdan nga gipasidan-an sa opisyal ang mga silingan ni Loon sa pagbantay ug pasirad-an ang ilang mga balay aron wala kini mapasakitan.
Gikan didto si Loon miadto hinuon sa merkado publiko sa maong barangay dala ang maong sundang hinungdan nga ang konsehal sa lungsod nga si Emilianito Burlasa mitabang na pag-awhag kaniya aron patahanon sa mga polis.
Usa ka panimalay diha sa maong merkado ang gisudlan ni Loon hinungdan nga naniyagit ang mga tawo diha sa sulod, apan usa sa nakapasamot sa kasuko niini mao ang mga tawong nagsunod-sunod kaniya.
Diha-diha sumala pa sa mga polis nanguros si Loon ug giatake og tigbas si konsehal Burlasa apan ang mga polis nga diha na nag-atang daling mipusil sa iyang tiil hinungdan sa iyang pagkahagba.
Si Loon daling gidisarmahan sa iyang gihuptang sundang ug gidala ngadto sa Ricardo Manigo District Hospital ug luwas na ang kahimtang.