'Hitman' sa Crips nadakpan sa Pardo

Usa ka giingong hitman sa Crips gang ang nadakpan sa mga sakop sa Pardo police station pinasikad sa warrant of arrest sa kasong murder gikan sa korte niadtong Sabado sa gabii diha sa sitio Kawayan, barangay Bulacao.

Atol sa pagsikop kang Raymund Abellanosa, 21, diha sa maong lugar, nakuhaan usab kini og usa ka .38 kalibreng paltik nga rebolber nga may unom ka buhing bala apan walay napakitang legal nga papeles paghupot niini.

Armado sa warrant of arrest gikan ni RTC Branch 18 judge Enriquita Belarmino, giadto ni Sr. Insp. Aureo Sanches, hepe sa Pardo police station ug miscellaneous team ang balay sa suspek.

Matud pang Sanchez, si Abellanosa maoy gitumbok nga hitman sa maong gang ug kini miangkon usab dihang ilang giimbestigar human sa pagdakop nga nalambigit na kini sa pagpamusil atol sa kagubot sa ilang grupo ug sa mga karibal nga Bloods gang diha sa ilang lugar.

Usa sa mga gitumbok nga insidente nga giingong giangkon ni Abellanosa mao ang insidente niadtong 2004 diha sa barangay Basak-Pardo, apan gisusi usab karon sa Pardo police station ang record sa Homicide Section tungod sa nadawat nilang report nga may kalambigitan si Abellanosa sa pagpusil sa usa ka giila lang nga “Api” diha sa sitio Newtown sa barangay Pardo niadtong 2002.

Gihulagway ni Cebu City Police Office director, Sr.Supt. Patrocinio Comendador nga problema ug hulga sa kahapsay ug kalinaw sa dakbayan ang kagubot sa mga gangs ug fraternities ug nanawagan sa ubang sektor lakip na mga ginikanan sa paghimo og mga lakang aron kapugngan ang kabataan pagsulod sa mga susamang grupo.