Usa ka lalaki ang gidakop sa Criminal Investigation and Detection Group-7 tungod sa kasong giatubang niini nga estafa diha sa sitio Maracas sa barangay Lahug ning dakbayan kagahapon sa udto.
Ang gidakop giilang si Marlon Ygaña, 29, residente sa maong dapit pinasikad sa warrant of arrest nga giluwatan sa usa ka huwes sa Pasay City nga si RTC Branch 119 Judge Pedro De Leon Gutierrez.
Si Ygaña nadakpan diha sa dalan Sabellano sa barangay Punta Prinsesa sa iyang gitrabahoan sa mga sakop sa tracker team sa CIDG-7 human sila makadawat og impormasyong dia sa Sugbu si Ygaña.
Dunay gitakdang piyansang P40,000 ang korte alang sa temporaryong kagawasan ni Ygaña.
Si Ygaña dihang gihinabi sa Banat News nagkanayon nga ang iyang kanhi gitrabahoang kompanya sa kaulohan maoy mikiha kaniya tungod sa kasong iyang gisang-at kaniadto batok sa kompanya tungod sa wala paghatag sa iyang kinse ka buwan nga suhulan.
Si Ygaña nagkanayon nga siya maoy auditor sa maong kompanya kaniadto ug mihimakak nga duna siya’y gihilabtang kwarta sa maong kompanya ug nagdudang posibleng nasuko ang tagdumala kaniya tungod sa pagkapilde sa ilang pag-apelar.