Dakbayan sa Talisay posibleng mohunong pag-suplay og mga karne ngadto sa dakbayan sa Sugbo tungod kay "expired" na ang accreditation sa ihawan sa Talisay.
Gikataho nga ang Department of Environment Natural Resources (DENR) wala mohatag og permit ngadto sa siyudad tungod sa pagkabaldado karon sa water treatment facilities sa nahisgutang ihawan diin ang mga hugaw nga tubig nga hinugas moawas na.
Ang permit sa DENR maoy usa sa mga rekisitos aron ang siyudad mahatagan og accreditation sa National Meat Inspection Services (NMIS).
Kun ang Talisay dili makakuha og accreditation sa NMIS posibleng dili na kini matugotan nga maka-suplay og karne gawas sa dakbayan.
Base usab sa taho nga 70 porsiyento sa karne sa dakbayan sa Sugbo ang naggikan sa Talisay.
Si Talisay City Administrator Richel Bacaltos mikompirmar nga niadto pang buwan sa Agosto na-expire ang accreditation sa ihawan diin gihikay pa sa siyudad ang mga rekisitos alang sa pag-renew niini.
Apan gihimakak ni Bacaltos kagahapon sa hapon sa pakighinabi niini sa Banat News nga conditional ang “AA” accreditation sa ihawan tungod kay wala kini makakumpleto sa tanang rekisitos.
Matud ni Bacaltos nga ang siyudad mipahigayon og butchering coarse tungod kay ang ihawan nakadawat og “AA” award.
Gihimakak usab ni Bacaltos ang taho nga wala makatuman sa tanang rekisitos ang siyudad alang sa ihawan.