Tulo ka kaso ang iduso batok  sa suspetsadong mipusil sa propsman

Gikatakdang ipasaka karong adlawa ang tulo ka mga kaso batok sa mga suspetsado sa pagpusil patay sa propsman nga si Alberto Roberto Ando, 21, anyos nga taga Palanas, Alcantara.

Si Senior Inspector Abraham Ocampo, hepe sa Police Station 3 sa Centro sa Mandaue nagkanayon nga ilang gipalig-on ang kaso sa pamahayag sa laing biktima nga si Edisa Felicilda.

Naglakip sa mga kaso nga ilang ipasaka mao ang murder, frustrated murder ug attempted murder.

Matud ni Ocampo nga si Felicilda nga hinigugma ni Ando maoy miila sa mga suspetsado.

Kahinumdoman nga si Felicilda kuyog nila ni Rolly Manaban ug   Ando nga naglakaw paingon sa pagpalit og sigarilyo sa tindahan sa luyo sa city hall.

Sa ilang paghidangat sa maong dapit ilang nasugatan ang nagkawo nga lalaki kinsa misaylo kanila apan mibalik ug miibot sa armas dayon namusil.

Sa imbestigasyon sa kapolisan si Felicilda miangkon nga sakop sa Alpha Kappa Rho (Akhro) apan dili na kini aktibo sa mga kalihokan sa maong fraternity.