Kap mi-'rape' sa ig-agaw nagtagotago

Kapitan sa Barangay Manipis sa Talisay City nga gipasakaan og kasong pagpanglugos sa iyang minor de edad nga ig-agaw padayon gihapon sa pagtago-tago.

Si PO3 Margienette Yosores, Women and Children’s Desk Officer sa kapolisan sa Talisay mibutyag kagahapon sa mga tigbalita nga sa milabay'ng semana milusot na ang warrant of arrest batok ni Kapitan Ramil Manayon ug atua na ang kopya niini sa ilang warrant server ug sa ubang mga polis aron masikop dayon nila ang suspetsado bisan asa kining dapita makita.

Hangtod karon, si Manayon nagpabilin pa kining nagtago-tago diin iyang gikuyog ang biktima.

Gibutyag ni Yosores nga ang ginikanan sa biktima miayuda kanila aron masikop si Manayon ug mauli ang ilang anak.

Sa wala pa malusot ang warrant, matud ni Yosores nga nagsige og text ang biktima sa iyang ginikanan nga i-atras ang kaso batok ni Manayon apan ang mga ginikanan sa biktima wala mopatuo sa hangyo sa ilang anak tungod sa kasagmuyo niini.

Si Yosores nagkanayon nga gawas nga suod nga paryente ni Manayon ang biktima ang ginikanan niini mao pa gyuy padrino sa kasal sa kapitan.

Kahinumduman nga si Manayon mipakita sa milabay'ng buwan ug mibutyag kini nga mobalik na siya sa pagpahigayon sa iyang serbisyo tungod kay "on leave" siya sulod sa lima ka buwan niadtong tungora nga wala siya magpakita tungod sa usa ka personal nga rason apan gipamubo niya ang iyang leave tungod kay natapos na ang iyang pag-asikaso sa iyang personal nga problema.

Apan dihang milusot na ang iyang warrant of arrest wala na gyud kini magpakita hangtud karon.