Mga bombero miresponde sa Guizo gipamukbok sa mga lumolupyo

Mga sakop sa kabomberohan sa dakbayan sa Mandaue gipangulata sa mga residente nga nasunogan sa Mantuyong ug Guizo sa milabay'ng hapon.

Kini tipik lamang sa pito ka mga problema nga nasinati sa Mandaue City Fire Department atol sa ilang pagresponde sa maong alarma.

Matud pa ni Mandaue City Fire Marshal Supt. Oscar Mayol nga nakasinati sila og problema samtang nagpasirit og tubig sa mga nasunog kabalayan.

Gikatahong dunay mga residenteng mangilog og hose aron unahon ang ilang mga balay nga nagdilaab apan kun dili tugtan manumbag dayon sila sa mga bombero.

Apan nasayran nga ang mga balay sa maong residente nga buot mangilog sa fire hose layo ra kaayo sa peligro.

Lakip sa nasinati nga problema sa mga bombero mao ang walay access road sa maong dapit ug maglisod sila og penetrate ilabi na nga moagi pa sila sa dakong kanal.

Ang pagbali sa hangin diin matud pa ni Mayol usa sa nakahatag og giya sa pag-ulbo og dako sa kalayo inay nga hapit na unta makontrolar ang maong sunog ug nakamugna kini og kadaut sa ilang mga firehoses

Kakulang sa tubig ug ang kadaghan sa mga tawo nga walay labot sa maong trahedya nga nanguryoso lang ang nakabara sa mga fire trucks dugangan pa sa mga kagamitan sa mga nasunugan nga anha gipamutang sa agianan.

Usa sa mga dugay nang problema sa kabomberohan mao ang kakulang sa mga fire trucks ug uban pang kahimanan sa pakigkombate sa sunog.

Gumikan niini, atol sa City Disaster Coordinating Council meeting uban ni RDCC Regional Director Alan Gaviola kagahapon sa buntag, si Mayol nangayo sa kagamhanang lokal sa dakbayan sa Mandaue nga hatagan sila og mga bag-ong kahimanan sa pagpakgang sa kalayo gumikan ang uban niining gamit kaniadto pang milabay nga 10 ngadto sa 20 ka tuig.

nSamtang gisusi na karon sa kabomberohan ang posibleng pagpangawat og kuryente sanglit usa kini sa mga kasagarang hinungdan sa sunog tungod kay dili mga eksperto ang mga mipatapot sa maong mga linya nga makaingon sa overloading, sumala pang Mayol.