Kapitan sa Umapad gireklamo ngadto sa Visayas Ombudsman

Gipasakaan og reklamo kagahapon sa Ombudsman Visayas si Barangay Kapitan Zaldy Lumapas sa Umapad, dakbayan sa Mandaue uban sa duha ka barangay tanod ug pipila ka mga kauban nga nagsibilyan nga gituohang sakop sa kapolisan sa Presinto 5 sa Opao Police Station.

Ang reklamo nagumikan sa nahitabong pagpatangtang ni Kapitan Lumapas sa goal sa basketball nga nagdala sa litra nga "Kaabag-Mandaue Jonas Cortes" nga gipahimutang sa gym sa sitio San Jose, Purok Star Apple sa Umapad.

Naglakip sa maong mga reklamo mao ang grave coercion, light threats, kalapasan sa Republic Act 6713 of the Code of Conduct and Ethical Standards for Public Official ug uban pa.

Si Jonas Cortes nga sakop sa konseho sa dakbayan maoy higpit nga kaatbang sa anak ni Mayor Thadeo Ouano nga si Jonkie Ouano alang sa pagka mayor sa Mayo 14 nga piniliay.

Ang nagduso og reklamo kang Kapitan Lumapas mao sila si Roy Barredo, Reckenvick Cortes, Reb Cortes ug Mary Clare Plando nga pulos hingkod ang panuigon ug lumolupyo sa maong dapit.

Lakip sa gipasakaan og reklamo nga barangay tanod si Eddie Saraon, usa ka Cuizon ug ang giingong kuyog nga mga polis nga wala mag-uniporme.

Base sa pinirmahang pamahayag sa mga reklamante maoy ilang gipadayag nga ang karaang basketball goal gidonar kanila niadto pang 1998 nga maoy gigamit sa tournament nga pasiugdahan sa panahon sa summer sa maong dapit.

Dugang pa sa mao nilang pamahayag nga gumikan kay naguba na man ang karaang basketball goal maoy ilang gihangyo ang barangay alang sa pag-repair o pag-ilis niini og bag-o nga maoy hinungdan nga ilang gipangayoan si Konsehal Jonas Cortes kinsa misanong usab sa paghatag niini.

Si Kapitan Lumapas sa iyang reaksiyon maoy iyang gipadayag nga ang pagtaud sa basketball goal wala managhid ang pundok ni Cortez hinungdan nga iya kining gipatangtang.

Giklaro ni Lumapas nga ang gym nga proyekto niya sa barangay nga gikan sa gahin ni kanhi 6th District Representative Efren Herrera maoy nalakip niini ang basketball goal.