Nang-hostage sa dept. store nasikop

Nasikop sa grupo sa Mobile Patrol Group (MPG) ang usa ka lalaki kinsa nang-hostage og sayes-anyos nga batang lalaki kagahapon pasado alas 6:00 sa gabii diha sulod sa usa ka dakung tindahan sa dalan Colon niining dakbayan.

Ang biktima giila sa mga polis nga si Gerance Ilarcosa taga Barangay Bulacao niining dakbayan kinsa nakaangkon og samad sa iyang duha ka tudlo sa tuong kamot daling gidala sa mga polis diha sa Cebu City Medical Center (CCMC) niining dakbayan.

Si Gerance posibleng migunit sa kutsilyo nga gition kaniya sa suspetsado hinungdan nga nasamad ang mga tudlo niini

Ang suspetsado giila usab sa mga polis nga si Solaiman Sultan, 21, usa ka vendor og CD kinsa nagpuyo diha sa dalan Sikatuna niining dakbayan.

Si Sultan nakaangkon usab og samad sa tuong paa tungod sa paglugnot-lugnot niini dihang gisikop kini sa mga polis

Si PO3 Edario Manatad, imbestigador sa homicide section sa Cebu City Police Office (CCPO) mibutyag sa Banat News nga si Gerance kuyog sa iyang inahan nga si Anolita nga nang-grocery sa maong tindahan.

Si Sultan kinsa adunay kauban diha usab sulod sa grocery sa tindahan.

Matud ni Manatad nga nagkaaway si Sultan ug ang kauban niini ug nagkarambola diha sa grocery apan sa walay igong hinungdan kalit nga gibira ni Sultan si Gerance ug gi-hostage.

Si Sultan nagtingkagol karon diha sa Police detention cell sa CCPO.