Pasko ug bag-ong tuig sa Barili mingaw

Imbes sadya ang Pasko ug Bag-ong Tuig, ang mga molupyo sa lungsod sa Barili miduyog sa kasubo sa ilang lungsod kay gikan niadtong Pasko, Rizal Day ug Bag-ong Tuig wala gyuy bisan usa ka parol nga gibitay aron mohayag ang Poblacion, matud pa ni Gary Estrada, usa ka balikbayan.

Si Estrada kinsa lumad nga taga Barili ug mobakasyon usahay ngadto sa gawas sa nasud nagkanayon nga nakalitan siya sa kamingaw sa lungsod nga lahi sa naandan.

Sukad kaniadto ang Poblacion, diin naa ang plaza, merkado publiko ug dagkong kabalayan, gi-adornohan gyud og mga parol nga magsiga sa kahayag panahon sa kagabhion uban usab sa mga dagitabnong siga nga magkidlapkidlap nga christmas lights.

Napanid-an usab ni Estrada ang nagkayagaw lang nga mga tinda sa merkado publiko karon nga gani milapas hangtod na sa duol sa karsada.

Maoy hinungdan nga dihang iyang gisusi ang mga edukado, propesyonal og sektor sa mga negosyante, ilang gipangandoy nga mahibalik sa puwesto si kanhi Mayor Tony Paras.

Si Paras nga nahulipan ni anhing Mayor Robert Alquizola, nakapakita sa maayo ug mauswagong kahimtang ang lungsod sa Barili sa iya pang panahon.

Si Alquizola wala kaayo makalahutay sa pagpatahom sa lungsod tungod kay sayo kining mitaliwan ug nakaserbisyo lang kini sulod sa usa ka tuig.

Si Estrada nagkanayon nga karong wala na si Alquizola, gipangandoy nila ni Paras nga mokandidato pag-usab sa umaabot nga election.

Hinuon nagkanayon si Estrada nga ilang suwayan paghangyo si Paras basin pa kun mosugot kini.