Comendador bag-ong hepe sa CCPO

Human sa dul-an tulo ka tuig nga talandugong paglingkod isip acting director sa Cebu City Police Office, gihulipan na kagahapon sa hapon si Supt. Melvin Gayotin ni Sr. Supt. Patrosenio Comendador isip maoy bag-ong acting city police director.

Atol sa simpleng turn-over ceremony nga gipahigayon sulod sa buhatan ni Police Regional Office 7 director, Chief Supt. Silverio Alarcio, Jr. pormal nga gipasa ni Gayotin ang pwesto kang Comendador.

Matud pang Alarcio acting director una si Comendador sanglit wala pa makasumitir og kumpletong pangalan aron maoy papilian sa Senior Officers Placement Board sa Crame nga maoy papilian kang Mayor Tomas Osmeña.

Si Comendador kinsa apil usab sa maong mga kandidato, underclass ni Gayotin sa Philippine National Police Academy og usa ka tuig. Si Gayotin mitapos sa PNPA niadtong tuig 1984 samtang si Comendador adtong 1985.

Natanggong ang pagsaka sa ranggo ni Gayotin ngadto na sa pag-full pledge nga koronel kon Sr.Supt. gumikan sa pending nga kaso niini sa Ombudsman for the Visayas nga gisang-at sa mga nagpiket nga mga kawani sa Holiday Plaza Hotel niadtong tuig 2005.

Matud pang Alarcio nga usa ka dakong hagit alang ni Comendador ang CCPO sanglit sa termino ni Gayotin nakahimo kini og daghang mga proyekto kontra kriminalidad ug maayong relasyon sa komunidad lakip na sa lokal nga kagamhanan.

Panahon sa termino ni Gayotin mius-os og dul-an 20 porsiyento ang krimen sa Sugbo ug miresulta usab sa pagkasikop sa mga dagkong mga bank robbery groups nga sama nila ni Rey Torres, Danny Limotan ug Dindo Ancero.

Si Comendador mipasalig hinuon nga iyang sundon ang mga lakang ni Gayotin ug buhaton ang tanan aron mas mapalabwan ang nahimo niini pinaagi sa pagbutang og mas daghang beat patrols ug pag-deploy og daghang polis sa kadalanan.

Si Gayotin sa iyang bahin nagkanayon nga taas na usab kaayong panahon siyang miserbisyo sa CCPO ug natagbaw siya sa iyang nabuhat ug dili siya motuong may bulok politika ang rason.

"Lisod kaayong i-link ko kang mayor (Osmeña) kay si mayor is looking on the performance, I don't think nga gi-relieved ko nila nga wala mag-agi og process, for me ang chance nako to serve Cebu City is more than enough," asoy pang Gayotin.

Samtang wala usab magmahay si Gayotin nga sa 174 ka mga gipatay nga mga badlungon sa vigilante pito ray nasulbad, "I have no regrets, I believed I have done my best," asoy niini.

Si Gayotin maoy mohulip sa pwesto ni Comendador isip operations chief sa Regional Intelligence and Investigation Division (RIID) aron usab mosaka ang iyang ranggo sumala pang Alarcio.