Daling gidala sa Talisay District Hospital si Rico Asuque 24-anyos taga Sityo Mananga II, Tabunok human kini dunggaba ni Lito Oros residente usab sa maong lugar.
Si SPO2 Raul Bacayo polis sa Talisay kinsa usa sa miresponde sa maong insidente mibutyag kagahapon sa Banat News nga maayong pagkahabwa sa tina-i ni Asuque.
Gibutyag ni Bacayo nga si Oros usa sa suspetsado sa mga nahitabong tulis sa Barangay Lagtang ug padayon pa nila kining gipangita karon tungod kay dali kining miikyas human sa hitabo.
Base sa imbestigasyon sa kapolisan sa Talisay nga si Asuque ug Oros nagduwa og hantak.
Sa padayong duwa sa duha nagkalalis kini og gipatiran ni Oros si Asuque dayon gidunggab sa suspetsado ang biktima.
Sa laing bahin, nakaangkon og duha ka samad dinunggaban sa likod nga bahin sa iyang lawas ang usa 28-anyos nga lalaki og dali usab kining gidala diha sa Talisay District Hospital.
Ang biktima giila sa mga polis sa Talisay nga si Seshendro Cabanes residente sa Sityo Tunga, Tanke.
Ang suspetsado mao si Brian Escalona residente usab sa lugar padayon pa usab kining gipangita sa mga polis.
Base sa imbestigasyon sa kapolisan sa siyudad nga si Escalona ug Cabanes nagkalalis.
Milakaw si Cabanes para mahunong na ang lalis nila ni Escalona apan sa pagtalikod sa biktima kalit kining gidunggab sa suspetsado duha ka higayon gamit ang usa ka kitchen knife.