...ipasulbad dayon ni Mayor Ouano

Gimando ni Mayor Thadeo Ouano sa kapolisan ang dinaliang pagsulbad sa kamatayon sa usa ka manager sa banko nga gituohang gitulis ug gipatay sa reclamation area sa miaging gabii.

Si Sr. Supt. Eduardo Catabas, direktor sa kapolisan sa maong dakbayan ang mimando usab sa iyang mga sakop sa pag-ila sa mamumuno.

Nunot niini higpit nga gipalig-on sa kapolisan ang seguridad sa Subangdaku human sa nagsunod-sunod nga panghitabo sa pagpamatay nga nakapabalaka sa mga lumolupyo.

Si Kapitan Walter Dy sa Subangdaku nga gikahinabi sa Banat News mipasabot nga sagad sa patay sa ilang dapit ilang gituohang naglambigit sa personal nga kasuko.

Matud pa niya nga ang ulahing panghitabo nga pagpatay kang Narciso Damole nga branch manager sa Allied Bank sa dalan A.C. Cortes Alang-Alang Mandaue nga gituohang gitulis ug gipatay maoy labing unang nahitabo sa miaging gabii.

Si Dy miingon nga iyang barangay tanod ug mga polis sa Presinto 2 mohimo og kinalit nga checkpoint sa kadalanan ug labi na gayod sa reclamation area.

Dugang pa niya ilang himuon ang pagpatrolya sa maong dapit aron sa pagpugong sa mga dautang elemento nga mohimo sa krimen panahon sa gabii.

Sumala pa niya nga labi pa nilang palig-onon ang siguridad sa ilang dapit ilabi na gayod niining nagkaduol nga kalihokan sa Asean Summit karong Disyembre.