Seguridad giplano pagbukas sa klase

Usa sa gihatagan og pagtagad sa kapolisan atol sa unang adlaw sa pagbukas sa klase kagahapon mao ang hulga sa terorismo.

Kini nalatid sa giduso nga security plans sa nagkalainlaing buhatan sa kapolisan sa kalungsuran sa lalawigan sa Sugbo Cebu ngadto sa Police Provincial Office.

Wala gisalikway sa kapolisan ang posibilidad sa terorismo sanglit usa ka maayong higayun sa mga terorista nga mabaniog lukop kalibutan ang ilang dautan nga buhaton ngadto sa kabataan nga motungha.

Ubos sa Oplan Balik Paaralan, ang kapolisan kanunay'ng nagtutok sa kriminalidad diin daghang inosenting kabataan ang mabiktima sa mga kriminal.

Gihatagan usab sa pagtagad sa kapolisan ang pagpahapsay sa dagan sa trapiko sa kadalanan aron malikayan ang disgrasya sa kabataan.

Gipakatap usab ang mga unipormadong kapolisan inabagan sa mga barangay tanod sa mga dapit diin nahimutang ang mga tunghaan aron dali rang matubag ang mga alarma.