Surigao nangharos sa Mantawi

Giharos sa lalawigan sa Surigao del Norte ang tanang premyo sa gipahigayong Mantawi Festival 2006 grand Mardi gras diin midala og P500 mil nga ganti sa milabay'ng adlaw sa Mandaue reclamation area dakbayan sa Mandaue.

Base sa hukom sa lima ka mga hurado pinaagi sa ilang chairman nga si Dr. Larry Gabao, nahukman nga ang Surigao del Norte Bunok-bunok Marajao Karajao maoy nakakuha sa ganti sa mga major ug special awards.

Sa religious showdown, midaug ang Surigao del Norte sa unang dapit ug nakaangkon og P300 mil samtang ang choreographer P20 mil ang ikaduha mao ang Consolacion Cebu nga nakaangkon og P150 mil ug ang choreographer P15 mil ug ang ikatulong dapit nakuha sa Tribu Guardo sa Brgy. Sambag I dakbayan sa Sugbo nga midala og P100 mil ug ang choreographer P10 mil.

Sa street dancing category nakuha gihapon sa Surigao del Norte ang unang dapit ug nakaangkon og P100 mil ikaduha ang Tribu Guardo sa Brgy. Sambag I diin misakmit sa P50 mil ug ang ikatulo mao ang Consolacion Cebu nga midala sa P20 mil ang tanan nakadawat usab og trophy.

Sa mga special awards nakuha sa Surigao del Norte ang best in musicality ug midawat sa P20 mil, best in costume P40 mil ug best in andas (Imahen sa Sr. San Jose nga gisakwat) P20 mil ug ang nakakuha sa best in choreography mao ang Consolacion Cebu nga midawat sa P40 mil.

Gipasalamatan ni Surigao del Norte Gov. Robert Lyndon Barbers nga personal nga misaksi sa maong festival ang mga Mandauehanon sa ilang gihatag nga suporta ngadto sa iyang contingents gumikan sa ilang kadaugan.

Gipasabot ni Barbers nga dako usab ang ilang gasto pagsalmot sa maong kalihukan sa Mandaue ug bisan pa kun wa sila makadaug kini isip ilang halad ngadto sa Sr. San Jose nga patron sa Mandaue ug isip usab little brother sa dakbayan sa Mandaue ang lalawigan sa Surigao.

Dako og garbo ni Barbers nga usa sa mamahimong mopresentar sa mga kalihukan sa Mandaue ilabi na sa nagsingabot nga ASEAN Summit dinhi sa Sugbo.