CAIB magpa-deputized sa OMB

Tinguha karon sa mga sakop sa Cebu City Anti Indecency Board (CAIB) nga mamahimong deputized agent sa Optical Media Board ug MTRCB aron mapalig-on ang pagukod niining padayong pagkatap sa mga pornographic materials kon law-ay'ng mga basahon ug mga pirated vcd's ug cds' dinhi sa dakbayan.

Mao kiniy sentro sa gihisgutan atol sa tigum sa CAIB kagahapong adlawa diin si Acting City Attorney Rodulfo Golez maoy nagpreside sa maong meeting.

Kini gumikan kay gitahasan sa board si CAIB tsirman Dr. Rene Josef Bullecer pag-adto sa kaulohan aron pagpakigkita ngadto kang OMB chairman Edu Manzano alang sa deputization niini.

Human sa maong meeting kagahapon ang mga sakop sa board nakigtagbo ngadto kang Criminal Investigation Detection Group 7 chief, Sr. Supt. Jose Jorge Corpus aron makig-alayon.

Si Corpuz mitug-an sa mga tigbalita kagahapon nga iya na usab gisubay karon ang alegasyong dunay mga sakop sa iyang buhatan nga gipasanginlang protektor sa mga namaligya og piratang mga VCD's diha sa dalan Colon.

Wala hinuon isalikway sa opisyal nga posibleng dunay mga polis o ba kaha magpapolis-polis nga migamit sa pangalan sa ilang buhatan aron sa paghimo og mga binuang.