Si Executive Secretary Eduardo Ermita nga maoy nagrepresentar sa presidente ug Chairman sa Anti-terrorism Task Force wa mohatag sa rason nganong wala katambong si Arroyo.
Hinuon dunay suwat-mensahe si Arroyo nga nagpasalamat sa mga partisipante sa labing unang CTEC, kining kalihukan gisaad ni Arroyo sa presidente sa Estados Unidos nga si George W. Bush sa milabay'ng tuig nga ang Pilipinas maoy unang mo-host sa CTEC.
Nanghinaut si Arroyo nga dunay mapanday ang mga delegado nga pamaagi pagsumpo sa terorismo dili lamang dinhi sa atong nasud kundi lukop kalibutan.
Matud pa ni Arroyo mahimong sa "hard o soft approaches" nga paagi mapuo ang maong problema.
Apan si United Nations Security Council President Margarette Loj nagkanayon nga dili basta masumpo ang terorismo kun grabe ang kawad-on sa matag nasud.
Sa tulo ka adlaw nga panagtigom sa CTEC sila motuki sa mosunod: Strengthening the Basis of Counter Terrorism, Strengthening Understanding of Global Terrorism, Dilemmas in the Fight against Terrorism ug Understanding Regional Approaches to Counter Terrorism.
Ang 500 ka mga partisipante gikan sa 60 ka mga nasud gipangulohan nila ni Benjamin P. Defensor Jr. ang Ambassador-at-large for Counter Terrorism, Sen. Rodolfo Biazon ug Sec. Cerge Remonde.