250 ka balay 'ugdaw

Mga "manuyopay" og shabu maoy gitumbok nga nakaingon sa pagkaugdaw sa 250 ka mga balay diha sa Sitio Sampaguita, barangay Tejero ning dakbayan sa Sugbu luyong bahin sa Cebu Provincial Detention and Rehabilitation Center niadtong milabay'ng gabii.

Ang barangay kapitan sa Tejero nga si Kapitan Lito Fajardo mitug-an sa pakighinabi sa Banat News nga suyupanan ang maong balay nga gipanag-iya ni Rogelio Peña , gani matud pa sa kapitan makadaghan nang naronda kaniadto ang maong dapit may labot sa ginadiling drogas.

"Maoy sulti -sulti sa mga tawo lagi, paghuman kuno pagsuyop gibubo ang gas sa lamparilya unya gitumba ang kandila," matud pang Fajardo base usab sa gitug-an kaniya sa mga nasunugan duol sa balay ni Fajardo.

Duhang pa niini nga ang maong balay maoy "gamitanan" sa mga manuyupay og shabu bugti sa bayad nga abang, apan bisan paman sa kanunay'ng pagronda diha sa ilang mga dapit magbalik-balik lang gihapon sa ilang panginabuhi ang mga badlungon.

Ang maong sunog nagsugod matud pa ni FO1 Butch Labasbas alas 10:47 sa gabii nga milanat og 37 ka minutos nga kumbate sa mga bombero. Gumikan kay ginama sa mga gaay ug ubang light materials ang kabalayang nagsikit-sikit ug peligro sa sikbit nga mga sitio giisa kini ngadto sa general alarm.

Lakip sa nasunugan mao ang reporter sa The Freeman ug writer ning mantalaan sa Hugyaw nga si Garry Lao, ang balay niini nakaagom og gamayng danyos.

Wala hinuoy natahong nangaangol sa insidente apan dunay mga makina sa video karera ug moli-moli ang nasigpatang gipagawas sa mga caretaker niini diha sa kadalanan.

Ang kapolisan sa Waterfront Police Station nakasakmit og usa ka moli-moli machine nga gisuwayan unta og ikyas, apan giabandonar nalang kini sa caretaker dihang nangabot ang mga polis.

Si Fajardo nagkanayon nga iyang kumpirmahon ang hinungdan sa maong sunog ilabi na sa kalambigitan sa mga drug personalities diha sa insidente. Matud pa niya nga bisan naa ra sa duol si SPO1 Adonis Dumpit magpuyo ang mao ra usab ang gibantayan sa mga badlungon dihang dapita.

Gibana-banang P640,000 maoy danyos sa naugdaw nga kabalayan ug kabtangan, samtang gisusi pa karon sa kabomberuhan ang tiunay nga sinugdanan sa maong sunog.

Ang pipila sa mga nasunugan diha na temporaryong mipuyo sa karaang CPDRC nga gibiyaan na sa Kapitolyo samtang ang uban diha sa mga luna nga kanhi gitukuran sa ilang balay mipahiluna gamit ang mga tolda sa kahadlok nga mailugan sa uban.