Aves kumbinsihon nga mosurender

Motabang ang mga kadagkuan sa Alpha Kappa Rho (AKRHO) fraternity sa pagkombinsir aron mo-surrender si Arestotle Aves ang wanted nga sakop sa maong grupo nga dunay patong nga ganti nga P300 mil.

Gibutyag kini ni Richard Buscayno, regional president sa Akrho dihang nahinabi sa Banat News nga dili sila manalipod ngadto ni bisan kinsang ilang mga sakop nga dunay tulobagon sa balaod.

Matud niya kapin sa tuig nang gisuspenso nila ang membership ni Aves sa ilang grupo ug hangtud karun wala na silay kumunikasyon niini.

Gitug-an hinoon ni Buscayno nga nakadawat siya og report nga atua na karun sa Mindanao si Aves ug iyaha kining gi-awhag nga motahan na lang sa balaod ug makig-alayon ngadto kaniya aron matabangan sa himoong pag-surrender.

Nasayran nga gidoble ni Mayor Tomas Osmeña ang P150 mil nga ganti ni Aves ngadto na sa P300 mil human kini nanghagit pa ngadto sa kapolisan nga maoy nangita kaniya.

Una nang gipasabot ni Osmeña nga dili siya magmakuli pag-dobli pa niining maong kantidad ubos sa reward system sa siyudad sa higayon nga padayong hagiton ni Aves ang mga otoridad aron gyud ma-ikag ang mga tawong dunay kasayuran sa nahimutangan niini sa pagreport sa kapulisan.

Gipasalig ni Buscayno nga andam og tagana ang ilang grupo nga maoy magsilbing taytayan alang sa malinawon nga pag-surrender sa maong suspek.

Nasayran nga dunay dili muminos walo ka mga kasong murder nga gi-atubang si Aves ug mao kini nag-una sa top ten ka mga sakop sa lainlaing fraternity nga gitanyagan og ganti sa kagamhanan sa dakbayan sa Sugbo.