Kini human nakonpirmar ni Osmeña gikan kang ERC Commissioner Jesus Alcordo nga nagkinahanglan og pormal nga petisyon ang maong ahensiya gikan sa mga apektadong hingtungdan aron duna silay igong basihanan sa pagpatunga sa maong isyu.
Kagahapon gimanduan dayon sa mayor si Joel Yu sa Cebu Investment Promotion Center (CIPC) sa pag-asikaso sa paghimo sa maong petisyon ug gitakda kini niyang pirmahan pagkahapon aron mapadala dayon kini ngadto sa buhatan sa ERC.
Gikabalak-an nga kun mahinayon ang planong paghunong ug suplay sa kuryente sa CPPC ngadto sa VECO gibanabanang mokabat sa 23 porsiyento ang mahanaw sa gi-apod-apod nga kuryente sa VECO ngadto sa mga konsumidor nga mo-resulta sa mga masinating pag-brown out sa mga lugar dinhi sa Metro Cebu.
Kini tungod kay 62 megawatts ang mawalang suplay nga kuryente sa CPPC ngadto sa VECO.
Si Osmeña nangusog nga kapugngan ang maong panghitabo gumikan ning nagsingabot nga kalihukan sa South East Asian Games kon 23rd Sea Games nga buksan na karung hapon.
Ang general manager sa CPPC Rorelio Lim maoy mipadala og suwat pagpahibalo sa konseho sa siyudad sa pagputol sa ilang gi-suplay nga kuryente sa VECO sugod unya sa petsa 26 niining bulana nunot usab sa kapakyas niini og negotiate sa napupos nilang Interim Agreement.