Matud pa ni Gullas nga mapasalamaton kaayo ang presidente ngadto kaniya ug sa ubang mga kongresista nga mitabang sa impeachment proceeding.
Si Gullas nagkanayon nga atol sa pag-imbitar sa presidente kanila og panihapon gihatag niya ang usa ka suwat hangyo nga mangayo siya og laing gahin para sa market-cum-terminal nga proyekto sa kagamhanan sa Talisay diin nahimutang kini diha sa barangay Lagtang.
Matud pa ni Gullas dili buot ipasabot nga nangayo siya og bawos sa iyang pagtabang sa presidente apan iya lang gisingil ang saad ni Arroyo nga magpadala og laing hangyo ang kagamhanan sa Talisay para sa laing tabang pinansiyal kun mahuman ang phase I sa maong merkado.
Dul-an sa P30 milyones ang gipangayo ni Gullas nga dugang salapi para sa maong proyekto.
Ang presidente misaad ni Gullas nga mohatag apan matud pa usab sa kongresista nga dili siya mag-expect nga P30 milyones gyud ang ihatag sa presidente.
Bisan og P10 milyones ang ihatag sa presidente magpasalamat gihapon siya niini tungod kay wala siya balibari sa iyang hangyo.