Crash course alang ni Duterte

Nagkalainlaing  reaksiyon sa katawhang Pilipino ang atong nabasa ug nadunggan kabahin sa usa ka gatus nga adlaw sa pangatungdanan ni Presidente Rodrigo Duterte. Adunay positibo nga mga komentaryo ug adunay mga negatibo usab.

Hinuon dili na ikatingala pa ang mga negatibong reaksiyon. Daghan ang nabalaka nga ang padayong pag-atake ni Duterte sa Estados Unidos, United Nations ug European Union maghatag unya og dili maayong epekto sa ekonomiya sa Pilipinas.

Hinuon gikabalita na nga daghan sa mga langyaw'ng mamumuhonan ang nagduha-duha na sa pagnegosyo dinhi sa nasud. Kini tungod lagi sa halang nga attitude sa atong presidente taliwala sa international community.

Sa akong tan-aw, dinhi gayud nga aspeto nga napalpak si Duterte. Ang iya nga pagsige og sungag kang United States President Barack Obama ug uban pang mga world leaders wala gyuy maayong idulot sa kalamboan sa Pilipinas.

Akoy gihasolan nga nagtan-aw sa mga adviser, ilabina ni Foreign Affairs Secretary Perfecto Yasay, ni Duterte nga magkapuliki intawon og panagang sa mga batikos gikan sa publiko sa higayon nga molabtik na ang mahait niya'ng dila ug momugna og dako nga kontrobersiya.

Maayo siguro nga mopailalum si Durterte og crash course mahitungod sa international diplomacy. Dili gayud maayo kun magpadayon kining iyang taras nga makadaot sa imahe sa Pilipinas taliwala sa internasyonal nga komunidad.

Hinuon, sa laing bahin, dako kaayo kong suporta sa padayon nga kampanya ni Duterte batok sa negosyo sa ilegal nga druga. Dili gayud ikalimod nga ang druga maoy nag-una nga problema sa nasud nga angay lamang tutokan sa kagamhanan.

Gani, mayoridad sa mga Pilipino ang misuporta gayud sa gihingusgang krusada sa ilegal nga druga sa kapolisan. Sa ka dako sa maong problema, kinahanglan gayud nga maluka sa otoridad ang gamot niini.