San Fernando mipakugang sa Minglanilla sa Governor’s Cup
CEBU, Philippines - Mihimo og dakung surprisa ang San Fernando Spartans human ilang gipakuratan ang kanhi wa’y pildeng Minglanilla, 76-73 sa South Division 1 sa 2017 Cebu Governor’s Cup Under-21 Inter-Cities and Municipalities Basketball Tournament niadtong Domingo sa gabii didto sa San Fernando Sports Complex.
Gumikan niini, ang San Fernando nakamugna og triple-tie sa liderato sa Bracket S1 uban sa Minglanilla ug Aqua Stars sa managsama nilang 3-1 win-loss records.
Si Shaun Keith Torquero mitali og 20 puntos ug si Ronald Alferez miamot og 15 puntos apil ang duha ka krusyal nga tres nga maoy nakababag sa tinguha sa Minglanilla nga makabangon.
Si Johnson Khen Saramosing miiskor og 12 puntos, samtang si Isidore Runjie Bamboa mihipos og otso sa iyang 10 puntos sa unang kuwarter nga nakahatag sa Spartans og 12 puntos nga labaw, 23-11. Ang Minglanilla miresbak pinaagi sa 15-7 run aron pagsikit niini ngadto na lang sa kuwatro puntos sa halftime, 26-30.
Mibalik ra hinuon ang kainit sa San Fernando hinungdan nga naangkon niini og balik ang 12 puntos nilang labaw, 59-47 human sa tulo ka kuwarter.
Nanglimbasog og maayo ang Minglanilla sa end game, apan daw sa napiangan sila human na-fouled out ang usa sa ilang mga sinaligan nga si Marc Glen Nebril sa sayong bahin sa katapusang kuwarter.
Si Nebril ug si Jiesel Tarrosa dunay 22 puntos matag usa, samtang si Sly Lucero mitapos og 10 puntos sa Minglanilla.
Sa sayo pa, ang Talisay wa’y hago nga mikulit sa ikatulo nilang daog human ma-forfeit ang Sibonga. (BANAT NEWS)
- Latest
