Kapin 1T ka balay naangkon sa 8 ka barangay
CEBU, Philippines - Dul-an sa 600 ka panimalay ang naangkon sa Lungsod sa Madridejos sa isla sa Bantayan gikan sa non-government organization, alang sa mga apektado sa bagyong Yolanda niadtong tuig 2013.
Mihatag og 593 ka panimalay ang Caritas Switzerland ngadto sa lima ka barangay sa maong lungsod matud ni Preciousa Derro, ang social housing project manager sa maong NGO. Ang lima ka barangay mao ang Tugas, Kangwayan, Kaongkod, Pili ug San Augustin.
Sumala pa ni Derro, nagsugod ang maong proyekto niadtong tuig 2015 diin matag benificiary gihatagan og tagsa ka gatos ka libo ka pesos, diin P32 mil niini alang sa labor ug P68 mil alang sa mga materyales nga gikinahanglan. Hinungdan nga nagmalampuson ang pagpatukod sa mga panimay kay ang matag benepisyaryo man ang modumala sa proyekto.
Sa kasamtangan, nagpadayon sab ang pagpahimo og kabalayan sa isla sa Kinatarkan alang sa tulo ka barangay nga gilangkuban sa Langub, Bitoon ug Hagdan nga muabot ngadto sa 600 ka balay.
Giangkon ni Derro nga mas daku sila’g gasto sa maong isla kay kinahanglan pang itabok ang mga materyales hinungdan nga wala na lang niya gibutyag kun pila ang ilang budget sa Kinatarkan.
Gawas sa mga balay, unom sab ka tunghaan sa Madridejos ug Kinatarkan Island ang gipaayo ug gitukod sa maong NGO.
Aduna usab silay gihatag nga proyekto sa walo ka barangay sa Madridejos ug Kinatarkan nga tag P250 mil nga naglangkob sa electrification sa kadalanan, water system, meeting hall, school fencing ug solar post.
Mapasalamaton ang mga nakadawat sa maong mga hinabang lakip na si Madridejos Vice Mayor Salvador Dela Fuente sa Caritas Switzerland.
Iya sab gipadayag ang kasagmuyo sa National Housing Authority kay upat na ka tuig ang nakalabay, aduna gihapoy mga pamilya sa ilang lungsod ang wala pay panimalay. Apan karong buwan sa Marso, moduso na sila sa ilang listahan sa mga mahimong benepisyaryo kay mopahigayon og bidding ang NHA sa 3, 600 ka balay. (BANAT NEWS)
- Latest