Edukasyon bahin HIV angay hingusgan – Palma

CEBU, Philippines - Ang arsobispo sa Sugbo miabiso sa publiko nga magbinantayon sa himoong desisyon sa kinabuhi ug sa mga posibleng resulta niini aron malikayan ang mga bati sama sa pagtakboy sa sakit nga wala nay kaayohan.

Mipadayag sa iyang sentimento si Cebu Archbishop José Palma subay sa sanitation issues nga mitumaw sa Cebu City Jail diin ang mga opisyal mibutyag nga nagkataas ang kaso sa Human Immunodeficiency Virus (HIV) sa mga piniriso niini.

Hinoon si Palma masaligon sa awtoridad sa pagtuman sa ilang responsibilidad sa paggunit sa maong isyu ug sa pagpangita og saktong kasulbaran.

Siya misugyot nga panghingusgan sa mga opisyal ang mga awareness program niini aron ang mga priso dili mahadlok magpa-test kay ang HIV testing services ma-avail lang kun ang tawo boluntaryong mopaubos niini.

Matud ni Palma nga ang information drive posible sab nga himoon gawas sa prisohan diin ang katawhan moduso og mga inisyatibo nga magpahibawo sa uban sa reyalidad sa HIV ug unsaon kini paglikay.

Ang arsobispo mipasabot nga ang tawo kinahanglan mahibawo sa mga implikasyon ug epekto niini sa ilang kinabuhi aron aduna sila’y mas tin-aw nga kahibalo ug makakab-ot og “well-informed decisions.”

Ang Artsidyosises sa Sugbo, sa ilang bahin, mipahigayon usab og education campaigns nga nagtuki sa sakit nga HIV nga usa karon sa mga giatubang nga public health issue.

Si Palma mipadayag nga adunay series of seminars ug talks sa mga miaging buwan ug tuig diin gihisgotan ang HIV ug ang lokal nga estado niini ug epekto ngadto sa kabatan-onan.

Bag-ohay lang, ang Cebu Caritas, Inc. ug ang Philippine Catholic HIV-AIDS Network-Cebu, mipahigayon og consultative forum bahin sa HIV sa usa ka panagtapok sa Dakbayan sa Sugbo nga gitambungan sa mga youth group, lay members, ug religious.

Ang HIV usa ka virus nga moatake sa immune system sa usa ka tawo diin ang labing advanced stage niini mao ang Acquired Immunodeficiency Syndrome kon AIDS diin matud sa World Health Organization, wala pa kini tambal apan adunay anti-retroviral drugs nga mokontrolar sa virus ug motabang sa pagpugong sa pagkatap niini. - /DILT) (BANAT NEWS)