Landslide ug baha sa Cebu City
CEBU, Philippines - Gumikan sa nasinati nga pag-uwan kagahapon, adunay mga pagdahili sa yuta ang natala sa Cebu City Disaster Risk Reduction Management Office (CCDRRMO) ug mga pagbaha.
Gipahibawo sa pangulo sa CCDRRMO nga si Nagiel Bañacia nga adunay nahitabong landslide sa Barangay Sirao, Sapangdaku, Binaliw, Agsungot, Busay ug Malubog. Ang mga opisyal sa maong mga barangay gimanduan sa pag-clear sa lugar aron maagian bisan og habal-habal.
Gawas sa landslide, nakadawat usab og report ang CCDRRMO nga adunay pagbaha sa Barangay Bacayan diin 11 ka balay ang nabanlas ug dul-an 300 ka indibidwal ang gipabakwit.
Gitutukan sab ang grabeng apektado sa landslide sama sa Sitio Tawagan sa Brgy. Sirao kay nahunlak ang halos tibuok dapit diin miabot sa 42 ka pamilya ang gipahikling ug temporaryong gipahiluna sa mga tunghaan sa Sirao ug Pung-ol Sibugay ug nahatagan na sila og survival kit sa Department of Social Welfare Services.
Gipa-alerto na sab sa siyudad ang Special Rescue Unit sa Bureau of Fire Protection kay gumikan sa kalihukan sa Sinulog nagkuwang sila og tawo samtang naka-standby usab ang Kaoshiung buses kun madugangan ang mga pabakwiton.
Gihatagan usab og kamanduan ang Division for the Welfare of the Urban Poor nga i-alerto ang tanang Homeowners Association sa siyudad aron kun dunay baha sila na mismo ang mohimo og force evacuation sa ilang mga miyembro.
Subay niini, si Konsehal Dave Tumulak ang chairman sa Committee on Public Safety and Order ug Deputy Mayor for Police Matter niingon nga nitabang gyud ang kapolisan ug nag-alayon ang CCDRRMO, City Engineering Department ug Department of Public Works and Highways alang sa mga landslide nga nahitabo.
Iyang giawhag ang katawhan ilabi na ang mga nagpuyo sa landslide ug flashflood prone areas nga kun mograbe ang sitwasyon, mohikling gyud aron malikay sa disgrasya. Decemay P. Padilla ug Jojo Ugdol (BANAT NEWS)
- Latest
