Ginobili mobalik pa sa Spurs
CEBU, Philippines - Mobalik pa og duwa si Manu Ginobili alang sa ika-16 niyang season uban sa San Antonio Spurs.
Kahinumduman, nga si Ginobili nagparamdam nga moretiro na human ang Spurs gipilde sa Golden State Warriors sa Western Conference finals sa miaging season.
Apan gitaho sa ESPN kagahapon nga si Ginobili nagpinalisar karon sa bag-ong kontrata aron makaduwa sa Spurs og usa pa ka tuig.
Nagsilbe si Ginobili sa tibuok niyang karera sa NBA uban sa Spurs diin siya nakapakita’g aksiyon sulod sa 922 ka duwa sa regular season ug 212 ka duwa sa playoffs.
Sa regular season, mi-average siya og 13.6 points, 3.6 rebounds, 3.9 assists ug 1.4 steals matag duwa.
Matud pa ni Ginobili nga mobalik siya gumikan kay iyang gibati nga puwede pa siyang makaduwa ug duna pa’y ikatampo sa Spurs.
“I do feel like I can still play. But that’s not what is going to make me retire or not,” matud pa ni Ginobili nga mag-40 anyos na karong Hulyo 28.
Sa miaging season, si Ginobili dunay average nga 7.5 puntos sulod sa 18.7 ka minutos matag duwa. Mikunhod man tuod ang iyang mga numero, apan dili malimod nga usa siya sa labing respetado ug tinamod nga magduduwa sa San Antonio.
Sulod sa 15 ka tuig, si Ginobili nahimutang sa ikalima sa labing daghan og puntos (13,467), duwa (992), assists (3,835) ug steals (1,349) sa kasaysayan sa Spurs. (BANAT NEWS)
- Latest