Mabdos, 16 sikop sa buy-bust

CEBU, Philippines - Mabdos ang usa sa mga nasikop sa managlahing buy-bust operation sa Dakbayan sa Lapu-Lapu, Mandaue, Danao ug Lungsod sa Liloan niadtong Martes.

Si Police Senior Inspector Joey Bicoy sa City Intelligence Branch sa Lapu-Lapu City Police niila sa mabdos nga si Katherine Manayon Dinoy, 24, kauban sa iyang igsuon nga si Analou, 25, sa Barangay Canjulao.

Ang managsuon nasakmitan sa kapolisan og 17 ka gagmay nga pakete sa shabu ug P800 nga kwarta.

Nadakpan sab sa Sitio Buyong, Maribago, Dakbayan sa Lapu-Lapu sila si Linard Inot Arnado, 33; Junrey Paquibot Ybanez, 30, Mary Juliet Alexa Pangatungan Aying, 26, ug Josephine Cañete Sollano, 35-anyos.

Nasakmit ang upat ka gagmay nga pakete sa shabu nga kantidad og P1,000 ug usa ka medium-sized.

Sa Sitio Salvacion, Maguikay, Dakbayan sa Mandaue nadakpan si Darre Almonte, 30, kinsa nasakmitan og lima ka gagmay nga pakete sa shabu.

Samtang ang kapolisan sa Dakbayan sa Danao nga gipangulohan sa hepe nga si Senior Inspector Alejandro Batobalonos ang nakasikop sab ni Jim Villarba Aresco, 37, taga Highway Looc, kinsa nasakmitan og 30 ka gagmay nga pakete sa shabu.

Sa Cogon, San Vicente, Liloan nasikop ang pamilya nga gidudahang pusher apan usa sa mga anak ang nakaeskapo.

Ang nadakpan mao ang amahan nga si Crispin Mantoja Jubay, 55, habal-habal drayber, ug anak nga si Crispin, 20, samtang nakaeskapo si Eduardo.

Nasakmit sa kapolisan ang 12 ka gagmay nga pakete sa shabu ug mga drug paraphernalia.

Samtang unom ka tawo lakip na ang amahan ug anak ang nasikop sa buy-bust operation sa Sitio Hawod, Bulacao, Dakbayan sa Talisay niadtong Martes sa gabii diin nakuha sa mga operatiba ang P400 mil nga balor sa shabu.

Target sa operasyon mao si Norman Andog, 24, kinsa giingon ni PO2 Radin Escanillan Jr. nga dugay na nilang gipangita.

Apil sa nasikop ang amahan nga si Servillano Andog, 51, kinsa niingon nga sige na siya og tambag sa iyang anak nga moundang na sa ilegal nga kalihukan apan wala nagpatuo.

Ubang nadakpan mao sila si Jed Gelaga, 24; Angelwin Lope, 18; Israel Baring, 31; Johnhyn Bacus, 25, ug si Alcher Alcuizar, 37-anyos.

Nakuha ang 148 ka gagmay nga pakete sa  shabu ingon man unom ka medium pack ug mga drug paraphernalia gikan sa mga dinakpan. Romeo T. Limpangog, Gabriel C. Bonjoc (BANAT NEWS)