15 intsik, 1 Pinoy dinakip sa illegal online gambling
MANILA, Philippines - Naaresto ng mga otoridad ang 15 Chinese national at isang Pinoy sa isinagawang raid ng PNP-Anti-Cybercime Group (PNP-ACG) kaugnay ng pagkakasangkot sa illegal online gambling kamakalawa ng gabi sa isang gusali sa San Miguel Avenue, Pasig City.
Kinilala ang mga naarestong suspek na sina Wu Haotao; Hu ha; Li Jing; Fei Yang; Guo Ming Jie; Jiang Peng; Ling Peng; Li Jian; Zhang Xiang Jie; Guo Han;Wei Xue Ling; Xu Zhixia; Shi Yun; Gao zi Zhuang; Lian Lin Fang; pawang mga babae at ang Pinoy na si Russellbert Yuzon Villar.
Batay sa ulat, bandang alas-8:00 ng gabi nang salakayin ng mga operatiba ang YD International Inc., 18th Floor, Belvedere Tower, San Miguel ng lungsod.
Bago ang operasyon ay nakatanggap ng impormasyon na illegal na nag-o-operate ng mga games sa online gambling ang kumpanyang YD International Incorporated kaya’t isinagawa ang surveillance operations.
Nang makumpirma ang impormasyon at sa bisa ng search warrant ay isinagawa ang raid sa nasabing gusali at hindi na nakapalag ang mga suspect matapos na maaresto ng mga ito sa aktong nagsasagawa ng illegal on line gambling.
Nasamsam mula sa mga suspect ang 50 system units, 42 sari-saring cellphone, 7 IPad mini, 5 routers, 2 DVR, 2 LED TV, isang printer, isang VOIP, sari-saring uri ng mga dokumento, mga Chinese ATM cards, mga passports at mga Identification Cards (IDs).
Kinasuhan ang mga suspek sa paglabag sa Presidential Decree (PD) 1602 (Illegal gambling) na inamyendahan bilang RA 9287 alinsunod sa RA 10175 (Cybercrime Law).
- Latest
