2 dating kampeon lalahok sa Le Tour
MANILA, Philippines - Kabuuang 15 koponan na tinatampukan ng dalawang dating kampeon ang matutunghayan sa pang-walong edisyon ng Le Tour de Filipinas sa Sabado.
Ang “Eighth’s Amazing” edition ng annual race na magbubukas sa International Cycling Union Asia Tour season ay muling dadaan sa pamilyar na ruta.
Muling babanderahan ni Mark Galedo ang 7 Eleven Roadbike Philippines sa hangaring makuha ang kanyang ikalawang korona matapos noong 2014.
Makakaagawan ng veteran Filipino rider para sa titulo si Frenchman Thomas Lebas, papadyak para sa Kinan Cycling Team, na naghari noong 2015.
Ipaparada ng 7 Eleven Roadbike Philippines ang isang four-man team sa four-stage 728.59-kilometer race na itinataguyod ng Petron at UPS bilang principal sponsors at Philippine Airlines bilang official airline partner.
Makakatuwang ni Galedo sina dating Asian Juniors road cycling bronze medalist Rustom Lim, RJ Peralta at Spaniard Edgar Nieto.
Lalahok din ang Philippine national team sa event na suportado rin ng Advanced Solutions Inc., Cargohaus Inc. CCN Sports Philippines, IWMI, NMM Customs Broker, Phenom Sportswear, UFL Philippines at WARM.
Si dating Olympian Bert Oconer ang tatayong coach ng tropa na binubuo nina George Oconer, John Renee Mier, Jerry Aquino Jr., Boots Ryan Cayubit at Mervin Corpus.
Ang iba pang koponang kasali ay ang Team Ikyo (Japan), Bridgestone Anchor Cycling Team (Japan), Oliver’s Real Food Racing (Australia), Terengganu Cycling Team (Malaysia), LX Pro Cycling Team (South Korea), Uzbekistan National Team, CCN Cycling Team (Laos), Keyi Look Sport Cycling Team (China), United Arab Emirates National Team, Attaque Team Gusto (Chinese Taipei) at Sapura Cycling Team (Malaysia).
- Latest
