PWD center tukuron, hospital ayuhon

CEBU, Philippines - Nigahin ang kagamhanan sa Probinsiya sa Sugbo og P2.6 milyones alang sa pagpaayo sa provincial hospitals ug pagpatukod og rehabilitation center sa persons with disability (PWD).

Si Bokal Christopher Baricuatro niduso og resolusyon alang sa P1.818 milyones nga budget nga gamiton sa pag-renovate sa pansayan ug bathrooms sa Danao City Provincial Hospital.

Si Gobernador Hilario Davide III nisaad sa pag-ayo sa mga pasilidad sa 16 ka provincial ug district hospitals lakip na niini ang libreng health services ngadto sa mga kabus pinaagi sa zero billing policy ug point-of-care program.

Si Baricuatro niduso usab kini og resolusyon alang sa P794,795 nga budget nga gamiton sa katukuran sa rehabilitation center sa PWD sa Minglanilla District Hospital.

Subay niini, si Dr. Rene Catan, hepe sa Provincial Health Office, nagkanayon nga priority karon sa kagamhanan sa probinsiya ang pag-upgrade ngadto sa level II sa tanang provincial hospitals.

Tumong niini nga maluag ang mga pasyente sa Vicente Sotto Memorial Medical Center sa Dakbayan sa Sugbo.

Ubos sa level II category, ang usa ka health care facility kinahanglang dunay specialized departments sama sa internal medicine, OB-gyne ug anesthesiology. Gi-require sab sa tambalanan nga dunay computed tomography (CT) scan ug magnetic resonance imaging (MRI) equipment.

Niining tuiga ang Kapitolyo nigahin og P133 milyones alang sa pag-upgrade sa hospital amenities lakip kini sa P488 milyones nga budget sa PHO niining tuiga.

Ang medicine supplies sa PHO niining tuiga nisaka ngadto sa 50 porsiyento diin niabot kini karon og P30 milyones gikan sa P15 milyones sa nilabay’ng tuig.

Ang mga hospitals sa probinsiya nga gikatakdang i-upgrade sa level II mao ang Dakbayan sa Carcar, Danao ug Bogo ug Lungsod sa Balamban.

Sa nilabay’ng semana ang hunta probinsiyal niaproba sa P17.1 milyones nga budget alang sa pagpaayo sa provincial hospital sa Dakbayan sa Bogo. (BANAT NEWS)