Pinangga sa Senyor Sto.Niño

CEBU, Philippines - Pinangga gyud sa Senyor Sto.Niño ang mga deboto. Kini maoy paghulagway ni Cebu Archbishop Jose Palma human sa fluvial procession kagahapon.

Si Archbishop Jose Palma, sa Archdiocese of Cebu mahinangpon sa kalampusan sa fluvial procession bisan sa hulga sa panahon.

Matud niya pinangga gyud sa Senyor Sto.Niño ang mga tawo tungod kay sa pagsugod sa prosisyon nikalma ang dagat hangtud nga nahuman kini ug luwas nga nakaabot sa Pier Uno ang galeyon.

Matud pa sa arsobispo, pagkaanindot tan-awon sa mga nangapil sa fluvial gikan sa mga fishing boat, cargo ship, sport vessels ug uban pa tungod kay nagpakita kini og panaghiusa ug pagyukbo sa Balaang Bata nga nagpakita kini sa tema nga Source of Communion sa tanan. Ang arsobispo malaumon nga ang katawhan magsunod ug mouban kaniya ngadto sa kinabuhing diyosnon ug padayon sa pagsuporta sa mga aktibidades sa kapistahan.

Kapin 200

Kapin 200 ka mga sakyanan sa dagat ang nangapil sa Fluvial Procession diha sa Mactan Channel nga kabahin sa kalihokan sa kapistahan sa Senyor Sto. Niño nga gisugdan og sayo tungod sa kadaotan sa panahon.

Kini ang gibutyag ni PCG Commander Dionilett Ampil nga nahinabi sa Banat News kinsa una nang miingon nga  55 lang ang opisyal nga naa sa listahan sa mga nagparehistro nila tungod kay ang ika 56 wala mahuman sa pagproseso sa dokumento.

Apan kagahapon, base sa iyang pagbanabana sa mga nanguyog niabot kini og kapin 200 ka mga klase-klase nga sakyanan sa dagat nga de motor nga dagko ug gagmay.

Sumala pa ni Ampil, mahinangpon siya nga bisan sa kadaghan nanguyog nga mga kolorum o kadto wa magpalista nituman gihapon sila sa panawagan nga mosunod lamang sa galeyon nga gikargahan sa mga imahen. Bisan adunay nagtinguha nga mopaduol sa gisakyan sa Mahal nga Birhen ug sa Balaang Bata apan paspas ra usab mopapadaplin kanila ang mga sea marshals water asset sa Coast Guard, Navy, BFAR ug mga volunteers ug mipatuo pud dayon ang mga nanguyog.

Gitug-an niya diha lang sila kutob sa Shell Island ug nibalik na gilayon sa Pier 1 tungod sa kadaghan sa mga sakayan nga nagpaabot sa Brgy. Pasil nga gikabalak-an nilang modugok sa galeyon ug mabara ang galeyon sa maong lugar.

Ang prosisyon nanukad sa Ouano Wharf padulong sa Muelle Osmeña Wharf atubangan sa Birhen sa Regla Parish Church sa Lapu-Lapu dayon nilahos sa Dakbayan sa Sugbo.

Mahinangpon si Ampil tungod kay bisan og nagulan-ulan ug bawod-bawod ang kadagatan sa sayo pa, apan pagsugod sa prosisyon nikalma ang dagat.

Mapasalamaton si Ampil sa mga sakop sa media nga nitabang kanila sa pagpadangat sa mga pahibalo aron mahimong malampuson ang tanan.

Si Fr. Pacifico Nohara Jr., ang rector sa Basilica Minore del Sto. Niño emosyonal nga gitug-an sa Banat News nga tanang mga deboto nga wala nakatambong sa maong kalihukan lakip gihapon sa iyang pag-ampo. Rowena D. Capistrano, Romeo T. Limpangog (BANAT NEWS)