Malungkot na birthday

Birthday ko’y sasapit

At ito’y darating na walang pagsala

Sa kanyang pagdating dapat ay masaya;

Subalit sa ngayon

Yaring aking puso ay laging may dusa’t

Magiging malungkot

Ang kaarawan kong ngayo’y malapit na!

Paanong di gayon

Sa ang aking mahal na mutya ng puso,

Ay biglang nawala

At kung nasaan na ay hindi ko tanto;

Mayroong nagsasabi

Na siya’y sumama sa dating kasuyo

Na nakabalikan

Nang sila sa landas ay muling magtagpo!

May nagsabi namang

Ang mutya kong giliw kung kaya nawala,

Nagtampo sa akin

Nang minsang makitang ako’y may kasama

Na magandang mutya

Na sa totoo lang ay hindi kaiba

Pagka’t siya’y dilag

Na pinsan kong buo sa panig ni Ama!

Kaya sa pagsapit

Ng aking pagsilang dapat magdiriwang,

Tanging ang puso ko

Nagdadalamhati sa lumayong hirang;

Kaya ang dalangin

Sa dakilang araw na ngayo’y daratal

Magbalik ka sinta

Na tanging ligaya nitong aking buhay!