Tabunok flyover sirad-an

CEBU, Philippines - Sirad-an na karong gabii ang Tabunok flyover alang sa iyang repair ug rehabilitation sumala pa ni Engr. Leslie Anthony Molina, district engineer sa Cebu Second District Engineering Office sa  Department of Public Works and Highways-7.

Ang maong flyover sirad-an sugod Marso 31 hangtud  Abril 2 kada alas 9 sa gabii hangtud alas 4 sa buntag.  Ang maong flyover sirad-an pagbalik Abril 4 hangtud 5 sugod alas 11 sa gabii hangtud alas 4 sa buntag.

Kini aron kabkabon ang aspalto ug ilisan og bag-o. Apan dili pa maayo ang expansion  joints kay wala pa maabot ang ilang suplay nga atoa pa sa South Korea nila gi-order.

Ang Tabunok flyover mao ang kinaunhang flyover sa Cebu nga gitukod kaniadtong 1992.

Samtang ang City of Talisay-Traffic Operation Development Authority (CT-TODA) mibahad nga ilaha gyung sikopon ang mga motorista nga gahi og ulo o masupakon gyud sa lagda sa trapiko.

Si Almond Dela Peña nagkanayon nga ilaha gyung bantayan kining mga drayber nga badlungon nga makabara sa mga alternatibong mga agianan samtang sirado ang flyover sa Tabunok.

Siya niingon nga dili sila magduha-duha sa pagsikop sa mga drayber nga badlungon ilabi na sa musunod nga adlaw tungod kay tibuok adlaw nga sirhan ang flyover. Mitchelle L. Palaubsanon ug Gabriel Bonjoc (BANAT NEWS)