Pinoy keglers nagpagulong ng 3 ginto sa Hong Kong tourney

MANILA, Philippines - Umani ang mga bagitong Pinoy keglers ng tatlong ginto, isang pilak at dalawang tansong medalya sa 17th Asian School Tenpin Bowling Championships na ginanap sa South China Athletic Association Bowling Centre sa Hong Kong.

Nanguna sa ratsada ng Pilipinas sina Kenzo Umali at Merwin Tan na umani ng tig-isang gintong medalya sa individual events habang pinangunahan din ng dalawa ang boys’ team sa pagkopo ng team event gold medal.

Namayagpag si Umali sa boys’ singles makaraang magpagulong ito ng 213, 243, 223, 267, 198 at 225 para sa kabuuang 1,369 pinfalls habang pinagharian naman ni Tan ang boys’ all events bunsod ng nakolekta nitong 3,991 pinfalls mula sa 1,323 sa singles, 1,360 sa doubles at 1,308 sa team.

Nakipagsanib puwersa sina Umali (1,309) at Tan (1,308) kina Louis Cantorna (1,131) at Ivan Malig (1,237) para kubrahin ang ginto sa boys’ team category ng torneong may basbas ng Asian Bowling Federation.

Nakuha rin nina Umali at Tan ang pilak sa boys’ dou­bles matapos itala ang pinagsamang 2,500 pinfalls.

Ang tanso ay galing kina Malig sa boys’ masters at sa girls’ team nina Daphne Custodio (1,109), Noelle Cam­pos (1,016), Grace Gella (1,044) at Jeika Yutero (906) na may naitalang kabuuang 4,075 pinfalls.

Nagtapos sa ikalawang puwesto ang Pilipinas sa overall medal standing kung saan nanguna ang Macau na may apat na ginto, isang pilak at dalawang tanso.