Minyo ang katipon

Dear Atty. Divine,

Ang akong anak nga babaye adunay live-in partner karon  duna sila’y anak nga one year old na. Akong nahibaw-an nga kining ka live-in sa akong anak, naminyo diay kini kaniadto og usa ka Japanese national apan nagbuwag sila 5 years ago na ug wa sila’y anak.

Ang iyang asawa giingong mibalik na sa Japan. Ang akong pangutana attorney, kun pananglit mobalik ang asawa sa ka live-in sa akong anak ug ikiha ang iyang bana, maapil ba ang akong anak? Unsa man ang maayo nilang buhaton aron makapakasal sila? Daghang salamat. — Jorge

Dear Jorge,

Base sa atong balaod kun ang usa ka minyo nga lalaki makigtipon og laing babaye nga dili niya asawa mahimo siya nga mapasakaan og kasong Concubinage, lakip na ang iyang gikapuyo nga babaye. Busa kun pananglit mobalik ang Hapon nga asawa sa live in partner sa imong anak, mahimo gyud sila nga makiha.

Pero base sa imong asoy nga tua na sa Japan ang Haponesa, imposible nga mobalik pa kadto sa Pilipinas aron lang sa paggukod sa iyang bana, ilabi na nga wa sila’y anak. Ang maayong buhaton sa live-in partner sa imong anak mao ang pagpa-annul sa iyang kaminyuon sa Haponesa aron siya makapakasal og usab. Mas maayong moduol siya sa iyang lawyer aron masuta kun aduna ba siya’y kabasehan sa pag-file og Annulment. Thanks and God bless!-Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.