Austria handa sa bagong estratehiya ni Cone

MANILA, Philippines -  Aminado si two-time PBA Grand Slam champion coach Tim Cone na hindi niya inaasahang mata­tambakan ang kanyang Barangay Ginebra ng nagdedepensang San Miguel sa Game One ng 2017 PBA Philippine Cup Finals.

“Certainly it was embarrassing and frustrating and thankfully it was Game One and not Game Seven,”  ani Cone matapos malasap ng Gin Kings ang 82-109 kabiguan sa Beermen noong Biyernes sa Mall of Asia Arena sa Pasay City.

“Our guys have to understand that we have to be at the very top of our game to have a chance to beat SMB, and needless to say, we were far, far from it,” dagdag pa nito.

Inaasahang reresbak ang Ginebra sa pagsagupa sa San Miguel sa Game Two ngayong alas-6:30 ng gabi sa Quezon Convention Center sa Lucena City.

Kumpiyansa si Beermen mentor Leo Austria, tubong Sariaya, na susuportahan siya ng kanyang mga kababayan para maibaon ang Gin Kings sa 0-2 sa kanilang best-of-seven championship series.

Bagama't tinambakan ng San Miguel ang Ginebra sa series opener, hindi naman nagkukumpiyansa si Austria.

Sinabi ni Austria na may itinatagong estratehiya si Cone para sa Game Two.

“It’s a ploy, a strategy. They were already prepa­ring their guys for the next game,” wika ni Austria. “It’s just the first game. Kno­wing coach Tim, they’re now preparing another game plan. They will come back strong in Game Two.”

May pruweba si Austria.

Sa kanilang best-of-five semifinals series ng nakaraang 2016 PBA Go­vernors Cup ay tinalo ng Beermen ang Gin Kings sa Game Four sa pamamagitan ng 29-point win.

Ngunit bumangon ang Ginebra sa Game Five nang kunin ang 25-point victory sa Game Five para makapasok sa PBA Finals laban sa Meralco.

Matapos ito ay nalagay din sa balag ng alanganin ang Gin Kings nang labanan ang Alaska Aces na nagbitbit ng 'twice-to-beat' advantage sa kanilang quarterfinals matchup.

Makaraang sibakin ang Alaska ay pinatalsik naman ng Ginebra ang Star sa Game Seven ng kanilang semis series.

“They can be down 0-1, 0-2, 0-3 it doesn't matter. There's always a possibility that they can come back because we have proven that,” sabi ni Austria.

Muling sasandigan ng Beermen sina 'three-peat' PBA Most Valuable Player awardee June Mar Fajardo, one-time PBA MVP Arwind Santos, Alex Cabagnot, Chris Ross at Marcio Lassiter katapat sina LA Tenorio, Japeth Aguilar, Sol Mercado, Scottie Thompson, Mark Caguioa at Jayjay Heterbrand ng Gin Kings.