Opisyales nga wala mosanong sa PDEA, ipangkiha

CEBU, Philippines -  Wala pay bisan usa ka barangay opisyal ang niduso og listahan o pangalan sa mga tawo nga nalambigit sa ilegal nga drugas gikan sa ilang mga barangay ngadto sa buhatan sa Philipine Drug Enforcement Agency 7.

Gibutyag ni PDEA-7 Regional Director Yogi Filemon Ruiz nga wa pay nadawat nga listahan ang iyang buhatan sa mga tawong nalambigit sa ilegal nga drugas gikan sa mga barangay opisyal.

Matud ni Ruiz nga aduna na siyay mga gihuptan nga ebidensya batok sa mga kapitan nga hangtod karon aduna gihapoy daghang presensya sa ilegal nga drugas sa ilang mga lugar. Hinoon gipaabot pa nila ang dugang ebidensya aron sa pagpalig-on sa ilang ipasang-at og kaso batok sa mga kapitan diin sa Dakbayan sa Sugbo lang daan adunay dili mominos napulo ka barangay ang ilang mapasakaan og kaso sa buhatan sa Visayas Ombudsman aron adto na sila manubag.

Sumala pa ni Ruiz nga wala pay bisan usa nga mga opisyal sa barangay ang nihatag og impormasyon kanila kun kinsa kadtong mga tawo nga ilang gisuspetsahan nga nalambigit sa ilegal nga drugas sa ilang barangay.

Subay niini ginganlan ni Ruiz ang pipila ka mga barangay diin hangtod karon anaa gihapon ang presensya sa ilegal nga drugas. Kini naglakip sa Brgy. Pasil, Duljo-Fatima ug Calamba sa Dakbayan sa Sugbo ug Brgy. Tanke sa dakbayan sa Talisay. Wala siya masayod kun unsay gihimo sa mga opisyal nga nagpabilin pa man gihapon ang suplay sa drugas sa ilang lugar.

Panawagan ni Ruiz sa barangay officials nga hatagan lang sila og mga pangalan sa nalambigit sa ilegal nga drugas ug sketch aron sila na ang bahala sa pagpahigayon sa validation ug operation. Rowena D. Capistrano (BANAT NEWS)