JRG Tennis Cup; Canete misidlak sa unang adlaw
CEBU, Philippines - Mipakita dayon sa iyang abilidad si Vincent John Canete sa unang adlaw sa 22nd JRG Gullas Tennis Cup kagahapon didto sa CitiGreen Tennis Resort sa Barangay Punta Princesa, ning siyudad.
Si Canete mirehistro og back-to-back nga kadaugan sa managlahing dibisyon. Gilatos niya si Aaron Galo, 4-1, 4-0 sa unisex 10-under. Iya kining gisundan sa laing dominanteng kadaugan batok ni Rafael Gonzales, 6-2, 6-1 sa boys 12 class.
Si Aaron Kevin Tabura midaog usab sa una niyang duwa sa unisex 10-under human niya gidispatsar si Cloyd Canoy, 4-1, 4-1. Ang ig-agaw ni Aaron Kevin nga si Scofield wala hinuon giswerte human kini mapukan ni Chad Connor Cuizon, 1-4, 0-4
Dominante usab ang unang duwa ni AJ McKenzie sa 10-under dihang iyang giserohan si David Sepulvida, 4-0, 4-0. Sama sa iyang manghud, si Ash impresibo usab batok ni Hannah Tapic, 6-2, 6-0, sa girls 14.
Sa boys 12 action, si Nathan Adlaon nakaipsot ni Samuel Garbosa, 7-4, 7-5, samtang si Marc Benedict Tapic mipilde ni James Paul Maro, 6-3, 6-1.
Laing miabante sa sunod round mao sila si Gio Jon Manito, Mitch Largo ug Miecoz Candelasa nga mipukan nila ni John Lataza, Clark Trazo ug Francis Plopenio. (BANAT NEWS)
- Latest
