PCUP rep sa Talisay pailisan

CEBU, Philippines -  Pahulipan sa kagamhanan sa Siyudad sa Talisay ang representante sa Presidential Commission for the Urban Poor nga si Ma. Llura Layun gumikan sa ilang ka wala’y salig na niini.

Apan si Layun nga nahinabi sa Banat News nihulagway nga pamolitika ang gibuhat sa mga opisyal nga niaprobar og resolusyon sa iyang pagpahulip. Si Konsehal Socrates Fernandez maoy nangamahan sa resolusyon nga giaprobahan niadtong Nobiyembre 8 aron sa paghangyo sa rehiyonal nga buhatan sa PCUP aron ila na nga pailisan si Layun isip coordinator sa siyudad.

Ang rason nga nalatid sa resolusyon mao nga daghan sila og nadawat nga reklamo batok ni Layun ingon man overstaying tungod kay niadtong 1995 pa man kini nahimong coordinator sa siyudad. Si Layun nipasabot nga ang ilang buhatan wala’y gitawag nga length of service sa usa ka lugar apan ang mga pasangil batok kaniya iyang gihulagway nga pamolitika.

Gani siya nipadayag nga nagmahay siya sa konseho tungod kay wala siya hatagi og higayon sa pagtubag sa mga reklamo batok kaniya.

Hinuon siya niingon nga andam siya nga mopahawa sa iyang katungdanan kun ang ilang hangyo aprobahan sa ilang rehiyonal nga buhatan.

Si Konsehal Doroteo Emit, chairman sa committee on urban poor sa konseho, nagkanayon nga ila ra unya ipatawag si Layun tungod kay aduna man sila’y himuon nga imbestigasyon kalabot sa kuwarta nga iyang gigamit ug kun nganong gitugutan kini sa mga niaging opisyal sa urban poor.

Siya nitataw nga igo na nga rason nga hulipan si Layun sa iyang katungdanan tungod kay dili man angay nga iyang gamiton ang kuwarta sa pederasyon sa urban poor.

Gihimakak sab ni Emit nga pamolitika ang ilang gibuhat kun dili trabaho lang ug wala’y personalan.

Si Bise Mayor Alan Bucao sa iyang bahin nipadayag nga dugay na gyud kaayo si Layun sa iyang posisyon ug angay na gyud sila nga mosuway og laing tawo sa iyang puwesto.

Matud ni Mayor Eduardo Gullas nga iya una lantawon ang resolusyon sa konseho ug gikatakdang ipatawag si Layun aron paminawon ang iyang habig. Ang mayor una nang nipahibawo nga basta kaayuhan sa Talisay ang gibuhat sa konseho andam siya mopaluyo niini. Gabriel C. Bonjoc (BANAT NEWS)