Saints, Fatima matatag sa liderato
MANILA, Philippines – Naiselyo ng St. Clare College-Caloocan ang ikatlong sunod na panalo matapos bombahin ang City University of Pasay, 88-65, kahapon sa 16th NAASCU men’s basketball tournament sa RTU gym sa Mandaluyong City.
Desidido ang Saints na mabawi ang koronang kanilang napanalunan noong 2012 nang ilatag nito ang agresibong laro sa pangunguna nina Rafael Rebugio at Aristotle Dionisio upang manatili sa tuktok ng standings bitbit ang imakuladang 3-0 rekord.
Kumana si Rebugio ng 19 puntos habang umariba si Dionisio ng 12 puntos para sa Caloocan City-based Saints.
Nauna nang nagwagi ang Saints sa AMA University, 82-67 at Philippine Merchant Marine School, 85-62.
Nagdagdag si Michael De Leon ng 10 para sa St. Clare.
Sa iba pang resulta, ginulantang ng Our Lady of Fatima University ang Philippine Christian University, 81-69, upang makisosyo sa liderato hawak ang 3-0 marka.
Wagi rin ang Manuel Luis Quezon University laban sa EARIST, 103-78, gayundin ang AMA University kontra New Era University, 84-79.
Nagtala ng pinagsamang 34 puntos sina Martin Gozum at Jess Pedrosa para sa Phoenix.
Gumawa ang 6-foot-2 trasferee mula Jose Rizal University na si Gozum ng 22 puntos para sa Fatima na hawak ni coach Ralph Emerson Rivera.
Nasayang ang 29 puntos ni Michael Ayonayon para sa Dolphins na nahulog sa 1-1 baraha.
- Latest
