Kalabasa award

Ang paghatag og Kalabasa Award, giisip sa uban nga usa ka pagpakauwaw, mao nga usahay kadtong mga hingtungdan mosinta gyud kay susama ra man og sila gipakauwawan.

Kaniadto, sa unang termino ni Tomas Osmeña pagka mayor dinhi sa dakbayan, iyang gihatagan og Kalabasa Award ang Philippine Air Lines kay niadtong higayona magsige lang og kalangay ang ilang biyahe.

Gidawat nga mahinangpon sa kadagkoan sa PAL ang maong Kalabasa Award nga gipatuyo gyud pagpahimo ni Osmeña gamit ang gipino-pino nga bato. May gidak-on gyud ang maong kalabasa nga hinimo sa bato, apan maalsa ra kay lungag man sa sulod. Nigpis nga bato ug gisumpay-sumpay aron maporma kini og kalabasa.

Gidawat sa kadagkoan sa PAL ang maong Kalabasa Award ug gihimo kini nga hagit kanila nga paninduton ang ilang serbisyo. Tuod, paglabay sa pipila ka tuig, minindot ang serbisyo sa PAL ug giuli nila kang Osmeña ang kalabasa nga bato.

* * *

Karon, si Mayor Osmeña nagplano na usab nga atol sa Charter Day sa dakbayan karong Pebrero 24, iyang hatagan og kalabasa award si Konsehal Jocelyn Pesquera. Ang rason ni Osmeña sa paghatag og kalabasa award ni Pesquera mao ang kanunay niya nga pagbabag sa tinguha ni Osmeña nga mabayaran na unta sa City Hall ang obligasyon niini ngadto kang Roque Ting, kang kansang yuta ug duha ka estraktura, naapil sa pag-reclaim sa South Road Properties. Matud ni Osmeña nga kaniadto, si Ting modawat ra unta og P9 milyones isip bayad sa iyang property nga naapil sa pag-reclaim sa SRP, apan wala gyud madayon kay gisupak ni Pesquera ug kanhi vice mayor Michael Rama.

Nipasaka og kaso si Ting ug ang hukmanan nimando nga bayran ang tag-iya sa yuta og P32 milyones. Gusto ni Osmeña nga bayran, apan kanunay’ng gisupak ang iyang tinguha.

Napugos pagsukol ang dakbayan ug ang kaso niabot sa Korte Suprema. Karong bag-o, gideklarar nga daog gihapon si Ting ug ang kantidad nga pabayran sa Korte Suprema niabot na og P56 milyones.

Gisukip ni Osmeña sa 2017 Annual Budget sa dakbayan ang P60 milyones aron maoy kuhaan sa ibayad kang Ting, apan matud ni Osmeña nga gilangan-langan na usab ni Pesquera.

Mao kini ang nasuk-an pag-ayo ni Osmeña kay nabalaka siya nga mag-anam gyud kadako ang kantidad. Matud ni Osmeña nga ang P60 milyones makapatungha na og dies mil ka tinun-an sa kolehiyo pinaagi sa city scholarship program.

Tan-aw nako, dili modawat sa kalabasa award si Pesquera. Matud ni Pesquera nga dagat man ang nahimutangan sa property ni Ting mao nga dili kini maayong bayaran.