Padulong mosuyop gi-ulo pagpusil, patay

CEBU, Philippines -  Nabuslot ang ulo sa usa ka lalaki nga paingong mogamit og ilegal nga drugas human siya gipusil sa nagtraysikad nga mamumuno didto sa Sitio Magay, Barangay Tangke sa dakbayan sa Talisay niadtong Biyernes sa gabii. Ang biktima nailhan nga si Noel Gabiana, 40 anyos, ulitawo, taga Sitio Atisan, Barangay Cansojong sa maong siyudad.

Matud ni SPO2 Yvonne Ilustrisimo sa Talisay City Police Station nga paingon sa sudlonon nga bahin sa nahisgutang lugar ang biktima dihang gisundan kini sa namusil kaniya nga nagsakay og traysikad.

Pag-abot sa nahisgutang lugar nikanaog ang gunman sa gisakyan niini nga traysikad ug dayon dul-it sa iyang armas ngadto sa ulo sa biktima.

Duha ka bala ang nalubong sa ulo ni Gabiana hinungdan sa iyang hinanaling kamatayon. Asoy pa ni Ilustrisimo nga tak-om ang baba sa mga tawo sa lugar nga nahitaboan apan ang igsuon sa namatay niangkon nga tiggamitan og drugas ang biktima.

Nagduda sila nga atraso ang motibo sa pagpamusil ug padayon pa ang kapolisan pag-imbistigar sa maong hitabo aron mailhan ang kriminal. Gabriel C. Bonjoc   (BANAT NEWS)