Pilipinas kulelat sa transpo, Internet
NANGARAP na naman nang gising si Noynoy Aquino. Kesyo raw dinaig niya lahat ng naunang pangulo. Sus! Sa bigas pa lang, sablay na siya; nangako ng self-sufficiency ng bansa sa ani simula 2013. Pero nagka-shortage at sipa ng presyo sa dalawang magkasunod na taon. Nanatili ang karalitaan sa 27%, gaya nung 1981. Pero dumami ang bilang ng maralita kasabay ng populasyon. Sa ilalim lang ni P-Noy namatayan ng mahigit 6,500 katao sa isang bagyo; kinapos sa driver’s license at vehicle plates; at pagkalagas ng dose-dosenang sundalo at pulis sa engkuwentro sa separatista at terorista. Nung Abril nangarap din si P-Noy na magka-submarine ang bansa, bagay na 10 taon para magawa.
Pinakasablay si P-Noy sa transportasyon at komunikasyon. Batid ito ng 11 milyong overseas workers at 20 milyong Pilipino na nakapangibang-bansa na. Nakikita nila na bagama’t mas maunlad sa abroad at mas maraming de-kotse, magaan pa rin ang trapik. Doon kasi, maraming kalsada at mahigpit sa batas trapiko. Tuluy-tuloy ang paggawa ng highways sa America, Australia, Europe at central Asia. Sa China, Russia at India tuluy-tuloy ang paglatag ng riles ng tren sa libu-libong kilometro. Huwag nang lumayo: sa Hong Kong, Singapore, Korea, at Japan ay mainam at malimit ang biyahe ng metro rails.
Dagsa ang biyahe ng ferries sa mga arkipelago ng Indonesia, Japan, Canada, Sweden, at isla-isla sa Europe at America. Samantalang sa Pilipinas, kakarag-karag ang iilang bumibiyaheng matatanda nang barko. Parating delayed ang flights ng airlines dahil sa runway congestion sa pangunahing airport na ipinangalan sa tatay ni P-Noy. Nanganganib pa ang pasaheros ng eroplano sa pangingikil ng airport security men sa tanim-bala at tanim-droga, at sa matagalang blackout.
Pinaka-mabagal ang Internet speed sa Pilipinas, kumpara sa Laos, Indonesia, Myanmar, Brunei, Malaysia, Cambodia, Vietnam, Thailand, China, US, Japan, Singapore.
- Latest