Ex- OFW timbog sa large scale ng illegal recruitment
MANILA, Philippines — Nanawagan ang National Bureau of Investigation (NBI) sa mga nabiktima ng isang dating Overseas Filipino Worker na naaresto ng mga operatiba ng NBI-Criminal Intelligence Division (NBI-CRID) matapos ireklamo ng anim na nabigong makaalis patungong Saudi Arabia, ayon sa ulat kahapon.
Kinilala ni Director Dante A. Gierran ang suspek na si Rico Paguio, dating nagtrabaho sa Riyadh, Saudi Arabia at residente ng Dagupan St., Tondo, Maynila.
Nadiskubre ng anim na indibidwal na ang suspek ay hindi naman konektado sa Sunergeous Manpower Services Corporation, taliwas sa kaniyang sinabi, at resigned na umano noon pang Pebrero 2017.
Ikinagalit ng mga biktima ang panlilinlang ng suspek nang malaman na wala itong authority na magrecruit ng manggagawa para sa ibayong dagat batay sa inilabas ng Philippine Overseas Employment Administration (POEA).
Nagdesisyon ang anim na isuplong sa NBI nang muli silang hingan ng karagdagang bayad para umano sa processing fee ng mga dokumento.
Nitong nakalipas na Enero 11, nakipagkita ang mga biktima sa suspek sa isang mall sa Maynila at doon na siya inaresto.
Nakapiit sa NBI ang suspek na nahaharap sa reklamong paglabag sa Republic Act 8042 (Large Scale Illegal Recruitment) at Estafa.
- Latest