Aberya pa sa MRT-3: 180 pasahero pinababa

MANILA, Philippines — Muli na namang nagkaroon ng aberya ang biyahe ng Metro Rail Transit  Line 3 (MRT-3) sanhi upang pababain ang may 180 pasahero nito kahapon ng umaga.

Batay sa abiso ng Department of Transportation (DOTr), nabatid na dakong alas-9:15 ng umaga nang makaranas ng electrical failure ang motor ng naturang tren, na dulot umano ng mga lumang electrical sub-components.

Dahil dito, napilitan ang pamunuan ng MRT-3 na pababain ang kabuuang 180 pasahero sa bahagi ng northbound section ng GMA-Kamuning Station sa Quezon City.

Gayunman, mabilis namang naisakay ang mga apektadong pasahero sa panibagong tren matapos ang pitong minuto para maihatid sa kani-kanilang destinasyon.

Ang tumirik namang bagon ay hinatak pabalik ng MRT-3 depot sa Quezon Avenue, Quezon City para isailalim sa preventive maintenance.

Muli na namang humingi ng paumanhin ang pamunuan ng MRT-3 sa mga pasaherong apektado ng panibagong aberya. 

Ang MRT-3 ay bumibiyahe sa kahabaan ng Edsa mula sa North Avenue, Quezon City patungo ng Taft Avenue, Pasay City at vice versa.