2 Liberian natimbog ng NBI sa fake dollars
MANILA, Philippines — Dalawang Liberian national ang naaresto sa isinagawang entrapment operation ng mga ahente ng National Bureau of Investigation-Special Action Unit (NBI-SAU) sa reklamo ng isang negosyante na nadenggoy ng malaking halaga sa pamumuhunan sa materyales ng mga pekeng dollar production sa bansa, sa Malate, Maynila, nitong Miyerkules.
Isinailalim na sa inquest proceedings sa Manila City Prosecutor’s Office ang dinakip na sina Abraham Victor alyas “George” at Harry Shoum Teenessee sa reklamong swindling/estafa ng isang negosyante na itinago ang pagkakilanlan.
Sa imbestigasyon, nakumbinsi umano ng mga suspek ang complainant na maglagak sa kanila ng initial $10,000 para ipambili ng kemikal na gagamitin sa paggawa ng US dollars. Nang ibalik ang ipinangakong package sa complainant, wala ang inaasa-hang special paper, machine at chemical na magko-convert umano para sa mistulang genuine na dolyar at sa halip ay isang improvised vault at cut-out na mga papel na kulay berde na kasinlaki ng dolyar.
Dahil sa kabiguan ng biktima sa inaasahan, nagawa niyang isuplong sa NBI ang mga suspek nang muli siyang tawagan sa hinihinging balanseng $90,000 sanhi upang isagawa ang entrapment.
- Latest
