P57.5M bagahe ng shabu, nasabat!
Idineklarang mga laruan
MANILA, Philippines — Nasabat ng pinagsanib na puwersa ng Philippine Drug Enforcement Agency (PDEA) at Ninoy Aquino International Airport — Inter-Agency Drug Interdiction Task Group (NAIA-IADITG) ang tinatayang may P57.5 milyong halaga ng shabu sa cargo office ng isang multinational courier service sa Pasay City, na kapwa idineklarang mga laruan.
Ayon kay PDEA Director General Aaron N. Aquino, ang mga naka-paketeng shabu ay nadiskubre sa tulong ng K9 dog at x-ray screening sa Ninoy Aquino International Airport (NAIA), nang magsagawa ng random check-up ang airport operatives.
Nabatid na ang dalawang bagahe ay ipinadala ng isang Tyler Wilson na may nakasaad na tirahang 4313 Sepulveda Blvd., Culver City, California 90230.
Ang consignee ng mga kargamento ay sina Rogelio Almodiel ng 11 North Stanford Residence, Tower 2, Upper Mckinley Road corner Florence Way Road, Taguig City, at Hasmine Erquiza ng 32 Vicente Espana Subd., Brgy. Tatalon, Quezon City.
Lumilitaw na ang unang parcel, na nasa anim na kilo at nagkakahalaga ng P30 milyon, ay nasabat, dakong alas-8:00 ng gabi ng PDEA Regional Office – National Capital Region sa ilalim ni Director Ismael Fajardo, Jr., at NAIA –IADITG.
Ipinadala ito sa bansa sa pamamagitan ng isang multinational courier delivery service na nakabase sa Andrew Avenue, Pasay City at idineklarang mga laruan.
Samantala, dakong alas-10:30 naman ng umaga noon Disyembre 4, nang masabat ang isa pang bagahe.
Nakapangalan ito kay Erquiza at may lamang 5.5 kilo ng shabu na nagkakahalaga ng P27.5 milyon.
Idineklara ring mga laruan ang laman ng bagahe.
Sinabi ni Aquino na kapwa hindi naman matagpuan sa naturang address sina Almodiel at Erquiza.
- Latest