200 pamilya nasunugan sa Taguig
MANILA, Philippines — Nagdulot ng matinding trapik ang sunog na naganap sa Bonifacio Global City (BCG) sa Taguig, kamakalawa ng gabi kung saan natupok ang humigit-kumulang sa 60 kabahayan at tinatayang aabot sa 200 pamilya ang naapektukhan habang tatlo katao ang bahagyang nasugatan.
Sa ulat ng Taguig City Fire Bureau of Fire Protection, alas-5:00 kamakalawa ng hapon nagsimula ang pagsiklab ng apoy sa isang informal settlers community sa Zone 7, Mini-Park, BGC, malapit sa isang mall.
Ayon sa isa sa mga residente na si Merly Tiad, nagsimula ang apoy mula sa inuupahang kuwarto malapit sa kanilang bahay.
Nabatid sa isa sa mga nasunugan na si Grace Ojeda, nakita niya sa bintana ang makapal na usok at malakas na apoy, dahilan upang tumakbo ito kasama ang mga anak palabas ng kanilang bahay, na ilang gamit at damit lamang ang kanilang nailigtas.
Dahil gawa lamang sa mga light materials mabilis na kumalat ang apoy, na kaagad na natupok ang tinatayang nasa 60 kabahayan.
Umabot sa Task Force Alpha ang sunog. Ang mga naapektuhang pamilya ay pansamantala munang namamalagi sa tent ng basketball court at barangay hall.
Sa ngayon ay wala pang supply ng kuryente sa lugar at iniimbestigahan pa ng mga awtoridad ang sanhi ng sunog at kung magkanong halaga ng mga ari-arian ang napinsala. Nagdulot naman aniya sa mga motorista nang napakabigat na daloy ng trapiko ang insidente.
- Latest